今晚英超聖誕新年快車另一場焦點大戰，愛華頓主場硬撼阿仙奴。「拖肥」愛華頓近態有起色全因防線回穩，連續兩場聯賽零失球，反觀阿仙奴攻力疲弱，射手奧巴美揚（圖）尚未重拾信心，預料作客必定更加保守，今場唔慌多波入，2.5球嘅入球細值得捧場。（Now 621周日凌晨1時30分直播）
開季表現弗爆嘅愛華頓，自從兩閘史密斯高文及盧卡斯迪治尼受傷後，主帥安察洛堤曾變陣343迎敵，可惜效果欠佳，一度6戰僅1勝，好彩「肥安」復用4人防線，由賀基迪及賓葛菲特客串兩閘，即於主場以1比0擊敗勁敵車路士。上場更作客送贈李斯特城兩隻光蛋，防線回穩係止跌關鍵。不過，愛華頓中場核心占士洛迪古斯早前受傷，已連續兩場缺陣，之前士哥不斷嘅前鋒卡維特利雲，近4場聯賽只入1球，腳風欠順，即使今仗主場出擊，亦未必敢冒險搶攻。
阿仙奴近期陷入低潮，主帥阿迪達堅持棄用奧斯爾，重金加盟嘅中場湯馬士柏迪一傷再傷，丹尼施巴路斯、韋利安狀態欠佳，其餘中場均屬守強攻弱型工兵，甚至要將前鋒拿卡錫迪移後客串「10號」位，可惜效果欠佳。
作客愛華頓先求穩守
「兵工廠」中場欠缺創造力，令火力大減，今季13場聯賽只入11球，上場亦僅能以1比1賽和修咸頓，最弊係隊長奧巴美揚開咧後僅入3個聯賽入球，其中1球更係12碼，難怪「兵工廠」依家淪落至下游掙扎。阿仙奴近4場聯賽作客只入1粒，全開兩球或以下，唔單止防中格列沙加今場要繼續坐波監，上仗領紅嘅中堅加比爾馬加希斯亦要停賽，預計造訪「拖肥」會先做好防守，2.5球嘅細盤最好路。
足球推荐网为广大球迷朋友们提供该场赛事的基本面解读、近期战况、综合分析、赛事推荐等信息。找全方位的足球信息服务，上足球推荐网！
