足球推荐网为广大球迷朋友们提供该场赛事的数据分析、历史战绩、赛事推荐等信息。找全方位的足球信息服务，上足球推荐网！
歐聯E組重頭戲，車路士主場鬥西維爾，兩隊分別係對上兩屆歐霸盃盟主，計實力及歐戰經驗本應不相伯仲，不過車仔近7次喺史丹福橋出戰歐聯只贏1次，而且今季大換血後仲未踢出隊形，後防又甩甩漏漏，對住英超剋星西維爾讓唔起對手，波童捧讓球客勝。
（Now 644、有線661及601台周三凌晨3時直播）
車仔主場冇甜頭
車路士係2018/19球季歐霸盃盟主，上季由林柏特領軍出戰歐聯16強出局，4場歐聯主場僅得1勝，如連同對上一次喺2017/18球季亮相歐聯，車路士近7場歐聯主場只得1勝4和2負，包括3次主場鬥西甲兵未贏過，主場完全冇優勢可言。
車路士今季陣容變動大，迪姆華拿、夏維斯、薛耶治等新兵質素毋庸置疑，不過暫時未能產生太大化學作用，而且後防始終係死穴，好似上場聯賽主場對修咸頓，車仔就喺大好形勢下被逼和3比3，無論用葛特蘇馬、安達斯基斯坦臣或堤亞高施華扼守中路都畀唔到人信心，門將阿列沙巴拿加、韋利卡巴尼路亦水準飄忽，新加盟嘅艾度亞文迪又有傷在身，前線入波隨時唔夠後防輸。
西維爾上季喺前西班牙國家隊主帥盧比迪古帶領下，歷史性第6次贏得歐霸盃冠軍，奪標之路更先後殺敗狼隊及曼聯，計埋佢哋2017/18球季歐聯對利物浦及曼聯，西維爾近6次歐洲賽對英超代表攞到3勝3和。西維爾踢法向來講求整體性，甚少因一、兩名球員缺陣或離隊致水準大跌，面對現時欠缺隊形嘅車仔有優勢，讓球客勝博得過。
